Нататкі & Трэды
Думкі на хаду, кароткія назіранні і міні-эсэ. Фармат прыстасаваны пад сацсеткі: кожны абзац — гэта асобны твіт ці слайд для каруселі ў Instagram.
«Тэхнабеларус» больш не «Тэхнабеларус». Сябры, даўно ад мяне не было навін — затое цяпер ёсць адразу вялікая: праект змяняе назву. Цяпер гэта **«Прастора распрацоўкі»** (ці проста Prastora.dev), а ва ўсіх сацсетках — новы нік **@prastoradev**. Чаму так? Калі коратка — старая назва стала зацеснай. Хацелася чагосьці больш шырокага, што адлюстроўвае не толькі мяне як аўтара, а само месца для росту, тэхналогій і кам'юніці. «Прастора распрацоўкі» — гэта якраз пра гэта: дзе мы з вамі можам гаварыць пра код, архітэктуру, кар'еру і ўсё, што вакол IT. Новае афармленне ўжо амаль гатовае — тэхна-мінімалізм, светлая і цёмная тэмы, зялёны акцэнт. Новы аватар у тым жа стылі: мой твар у квадратных дужках. Кантэнт нікуды не дзенецца — застаюцца і вялікія артыкулы з відэа, і кароткія нататкі, і думкі, і рассылка з падкастам. Проста стане больш структуравана, каб лягчэй было знаходзіць сваё. Адным словам, не губляйце мяне ў стужцы, калі ўбачыце новае афармленне — гэта ўсё яшчэ я. А пакуль напішыце ў каментарах, як вам новая назва?
Былі такія «аператары ЭВМ» калісці, цяпер жа праца праграміста — літаральна «аператар LLM».
Здаецца знайшоў цікавы інструмент для распрацоўкі адначасова і пад iOS і пад Android, але праз нармальны SwiftUI і Jetpack Compose — без неабходнасці React Native. [skip.tools](https://skip.tools)
"Тата ў мяне вядомы, ён блогер, у яго нават падпісчыкі ёсць!" У прынцыпе, можна на гэтым жыць, думаю на год хопіць ☺️
З Новым Годам! 🎄 Сябры, жадаю менш багаў, паразумення з калегамі і каб ШІ не займаўся дурасцю падчас вайбкодынгу! 😊 А яшчэ сямейнага цяпла і дабрабыту! Са святамі!
Інкрэмент! Ці то старэю, ці то проста спазнаў дзэн, але гэта першы раз, калі няма жадання падводзіць нейкія вынікі, а проста атрымліваю асалоду ад таго, што магу і ўмею.
З восені пачаў пакрысе рабіць некалькі праектаў для веласупольнасці Беларусі, звязаных з брэветамі (гэта такія паездкі ад 200 км і больш за адведзены час), і мне патрэбна дапамога UI/UX дызайнера. Буду рады рэкамендацыям. Праца за грошы, хоць бюджэт пакуль і невялікі.
Вечар разам з ChatGPT, і нарэшце зрабіў прыблуду, якая ўмее лічыць колькасць адзначаных чэкбоксаў на старонцы Notion і аддаваць назад у адмысловае поле. Відаць, зраблю open source, аднак налады не простыя, і для звычайных людзей лепш зрабіць інтэрфейс.
Чарговы бот навайбкоджаны. Гэтым разам працуе на Nitro, grammY і db0 і запускаецца на Cloudflare Workers + D1 у якасці базы даных. Воркеры значна лепш і стабільней за Render, хоць і маюць свае абмежаванні. Дзе б цяпер знайсці сілы напісаць які артыкул.
Заўважыў, што падчас працы з нейронкамі вылез адзін цікавы пазітыўны момант: даводзіцца шмат камунікаваць з імі па-англійску, і так ці інакш гэта трэніруе ўменне пісьмовай англійскай мовы.
Беларуская мова ў занядбанні, кажаце? А як вам навіна бадай пра першы прададзены/куплены беларускамоўны тэлеграм-канал? Віталь Аляхновіч там «Усё пра ўсё» выкупіў. Я ў шоку, добрым, але ў шоку.
Урок, які каштаваў мне 5$. Нават спынены інстанс, набыты праз Amazon Lightsail Bundle, будзе падлічаны для аплаты, таму калі ён вам больш не патрэбны — лепш адразу выдаляйце. Ну і зноў напамін сабе болей не мець спраў з AWS.
Ранішні MDP Style Выбраўся сёння трошкі пракаціцца раніцай па маршруту Minsk Dawn Patrol — гэтым разам шасэйны варыянт на 40 кіламетраў. Ехаў не ў такую рань, як звычайна хлопцы і дзяўчаты (старт а 5:40), трошкі пазней. Без горачак і ветру не абышлося, але я асабліва і не спяшаўся.
Падумваю вярнуцца да падкасту з IT-навінамі, але ёсць праблема: фізічна не хапае часу ўсё праглядаць і адбіраць цікавае. Сервіс Feedly мае магчымасць з дапамогай ШІ такое рабіць, але просіць 8$ на месяц. Ці варта паспрабаваць?
Даўно мяне тут не было, але пакуль лета — лаўлю кожную магчымасць пакаціцца 🚴, пакуль надвор'е дазваляе. [Маршрут на Strava](https://www.strava.com/activities/15107359646)
Выглядае, знайшоў прыблуду, каб публікаваць адначасова ў твітар, трэдс, мастадон і блускай. Бясплатна, з рэдактарам трэдаў і нават па раскладзе.
**Stitch ад Google амаль намаляваў мне сайт…** Сёння прыйшоў ліст ад **Arnaud Benard** пра тое, што Google прыдбаў яго праект Galileo AI — сервіс для стварэння дызайнаў сайтаў з дапамогай штучнага інтэлекту, які цяпер даступны ўсім бясплатна пад новым імем [Stitch](https://stitch.withgoogle.com/). Я паспрабаваў у ім намаляваць сайт свайго праекту **«Тэхнабеларус»** і нешта быццам бы пачало нават атрымлівацца, але потым яго добра так папярдоліла (выбачайце). Агульную задумку ён разумее няблага, але калі пачынаеш прасіць выправіць нейкія дэталі — пачынае шкоднічаць. Калі даваць больш дакладныя інструкцыі і прасіць зрабіць асобныя кампаненты, магчыма, нешта і атрымаецца. Аднак, як і з праграмаваннем праз ШІ, без сталага вопыту ў дызайне вынік хутчэй за ўсё будзе «з гаўна і палак». Адным словам, для прафесіянала, які ведае што рабіць, ШІ добры памочнік, а дурню малаток дай, дык і пальцы сабе паадбівае і малаток зламае.
А што, калі штучны інтэлект не канкурэнт, а памочнік? Учора патраціў гадзіну-дзве і нарэшце [Lovable](https://lovable.dev) (сервіс для стварэння сайтаў, аналаг bolt.new і v0.dev) і Cursor разам далі першыя вынікі! У мяне даўно быў трошкі паламаны сайт кампаніі Alroniks Tech, які я ўсё ніяк не мог прывесці ў парадак. Патрэбы вострай у сайце няма, дый кампаніі пакуль так сама няма (але некалі будзе). А вось працы там было шмат, каб дарабіць. З дапамогай Lovable я зрабіў першы прататып, скарміўшы яму некалькі фота сайтаў, якія падабаюцца. Потым з дапамогай Cursor дарабіў тэхнічныя моманты і заліў сайт на Netlify. Асабліва зручна было мяняць колеры ў розных месцах, проста папрасіўшы Cursor знайсці і замяніць. Для мяне асабіста такі падыход — проста срэбраная куля. Мне цяжка пачынаць нешта маштабнае, бо ведаю, колькі там працы, і гэта пужае. Але калі ёсць памочнік, якому можна даручыць тое, што не падабаецца рабіць, то ўсё рухаецца значна хутчэй. А як вядома з псіхалогіі, нават прамежкавы вынік падвышае ўзровень энергіі. Адным словам, рэкамендую!
YouTube навучыўся рабіць аўтаматычныя субтытры для беларускай мовы. На маіх відэа пакуль нічога няма, але трэнд пазітыўны ўсё адно! Усе гэтыя сервісы пакрысе нешта адзін у аднаго бяруць і паляпшаюць, таму магчыма хутка пабачым і ў Instagram з TikTok.
Праехаў перад працай 40 кіламетраў сапраўднага гравела ад [Minsk Dawn Patrol](https://t.me/vandrovarny/95). Было цікава, весела і вельмі прыгожа.
Учора вырашаў адну сваю праблему на кампе і падалося, што я такі не адзін. І ўзнікла думка: а што, калі выкарыстоўваючы падыход Vibe Coding, стварыць прадукт і распавядаць пакрокава, што і як я раблю? Паспрабую, калі назбіраецца дастаткова цікаўных.
Лайфхак! Калі ў вас раптам на macOS малавата месца і ў наладах паказваецца, што яно занята нібыта System Data, то павыдаляйце `node_modules` у розных праектах — гэта яно!
**Беларускую мову дадалі ў папулярны генератар субтытраў** Мабільная аплікацыя Captions дазваляе аўтаматычна дадаваць субтытры на створанае відэа з дапамогай штучнага інтэлекту. Карыстальнікі заўважылі, што беларуская з'явілася ў спісе моваў, на якіх можна ствараць подпісы. З'яўленне беларускай мовы ў Captions дае магчымасць кожнаму не толькі генераваць субтытры на беларускай мове літаральна ў два клікі, але і перакладаць на беларускую відэа, агучаныя на англійскай, нямецкай і іншых мовах.
Гэты акаунт я заводзіў у дапаўненне да інстаграму, каб нешта пісаць пра тэхналогіі і сюды. Але ёсць яшчэ асабісты інст пра падарожжы, веласіпед і сям'ю, куды планую нешта публікаваць з надыходам цеплыні. Пытанне: ці варта заводзіць яшчэ адзін Threads-акаунт? З аднаго боку, аўтапублікацыі выдатна працуюць. З іншага — яшчэ адна кропка складанасці, бо патрэбна неяк сачыць за абодвума.
А вы ведалі, што над вялікай літарай «І» кропка не ставіцца толькі ў выпадку друкаванага тэксту, а калі ж пісаць рукамі — то кропка абавязковая? Між тым гэта ў законе напісана! З Днём роднай мовы!
Выпадкова адкапаў цікавы рэсурс, пакуль шукаў варыянты перакладу аднаго слова. Гэта курс лекцый па тэме **«Сучасная беларуская літаратурная мова»** ад Лобань Наталлі Пятроўны. Там адносна коратка і сціпла, але сістэмна і грунтоўна пададзена шмат цікавай інфармацыі пра сучасную беларускую мову. Тым, хто стварае кантэнт па-беларуску, дакладна будзе карысна. [Курс лекцый на сайце БДПУ](https://bit.ly/sbmova)
Непрыемная праўда, але яе патрэбна ведаць, калі вы запускаеце прадукт: першымі вашымі карыстальнікамі будуць махляры, якія зробяць усё, каб скрасці ў вас грошы.
Для беларускамоўных стваральнікаў! Знайшоў плагін для аўтаматычных субтытраў у DaVinci Resolve 19. Ёсць падтрымка беларускай мовы і магчымасць абраць ШІ-мадэль. Памылкі ёсць, але значна лепш чым у CapCut (які яшчэ і платны). [Auto-Subs плагін](https://tom-moroney.com/auto-subs/)
Ладна, AI маладзец. Зрабіў мне сайт, які выглядае даволі прыстойна і нават працуе без хібаў. Маім запытам было зрабіць зручны пошукавік для брэветаў па Беларусі на бягучы сезон. Скончыліся бясплатныя токены, таму працягваць давядзецца ўжо самастойна і ўласнымі рукамі. Успомнілася, як некалькі год таму была мода на генератары праектаў для фронтэнду. Вось гэта такі генератар на стэроідах, які робіць 50–80% рознай дробязі, а ты дапісваеш ужо асноўную бізнэс-логіку. Ідэальны сімбіёз. [bolt.new](https://bolt.new)
**З новым годам! 🎉** Патрошку, неяк незаўважна дзень за днём, але вось 2024 год і скончыўся. Упэўнены, усе гэтыя 365 дзён вы нешта рабілі, часам карыснае, часам не, але відавочна — жылі не дарма, нават калі вынік пакуль не бачны. Вы малайцы! Дзякуй вам, за тое, што чытаеце, глядзіце, каментуеце і падтрымліваеце! Для мяне гэта лепшы вынік маёй працы. Віншую вас з Новым годам! Зычу, каб у наступным годзе справы ў вас рупіліся і вам хапіла на гэта здароўя, а яшчэ дабрабыту і шчасця!
Сябры, віншую ўсіх датычных са святам! 🎄 Жадаю вам здароўя, дабрабыту, свабоды ў думках і агню ў сэрцы, плёну ў справах і здзяйснення мар! Сёння павінен быў выйсці чарговы выпуск Айцікаст Навін, але з-за напружанай працы апошнімі днямі фізічна не паспеў яго запісаць і апрацаваць. Вырашыў зрабіць пашыраны святочны выпуск — ужо на наступным тыдні, таму не губляйцеся.
Дазволіў YouTube выкарыстоўваць увесь змест свайго канала для ўсіх кампаній, якія працуюць са штучным інтэлектам. Можа хоць так навучацца беларускай.
YouTube выключыў манетызацыю для беларусаў. З сервісаў, якія яшчэ хоць неяк працуюць, застаўся толькі Patreon. Выглядае кампрамісным рашэннем на бягучы момант, хоць і вельмі сумным.
Даўно я падкастамі не займаўся, а там аказваецца падвезлі новыя стандарты для RSS. Там і chapters як на YouTube, і спасылкі на данаты, і шмат чаго іншага. [Podcast Namespace 2.0 на GitHub](https://github.com/Podcastindex-org/podcast-namespace/blob/main/docs/1.0.md) _til ← сёння я даведаўся_
Зноў злавіў архітэктурны параліч. Апісаў бы гэта як стан, калі ты быццам бы ведаеш задачу, ведаеш стос інструментаў, якія могуць дапамагчы, але не можаш мазгамі ахапіць усё рашэнне цалкам і не можаш абраць нейкі адзіны набор. Але ж выдатных і карысных інструментаў існуе процьма — і чым больш у цябе досведу, тым цяжэй потым выбіраць.
Тэхналогіі без правадоў — крута, але ж як мяне задзяўбло адключэнне bluetooth-клавіятуры і доўгае падключэнне, калі яна вельмі патрэбна! Словамі проста не апісаць. Плюнуў і набыў usb-хаб і паўтыкаў правады назад.
Buy Me a Coffee перастае быць актуальным для беларусаў у Беларусі: будзе немагчыма вывесці грошы. У мяне там завісла 7 даляраў, а для вываду патрэбна мінімум 10. Для мяне гэта быў сігнал закрыць старонку і перайсці на альтэрнатывы, якія працуюць для беларусаў.
Пакрысе пачынаю вяртацца ў сваё вела-жыццё 🚴, таму фота-галерэя на тэлефоне пачала напаўняцца з падвышанай хуткасцю. Каб не мяшаць змест і не блытаць алгарытмы, вырашыў зрабіць асобныя ад Тэхнабеларуса акаунты для публікацыі матэрыялаў з паездак, відэа пра веласіпеды і іншага.
**Вандровар — вела-падарожжы і не толькі** Сёння раніцай, прадзёршы вочы ў 4 гадзіны, выбраўся на адну з такіх паездак. Мэтай было паглядзець на 600-гадовы дуб, што ў вёсцы Карпілаўка, пабоўтацца па лесе, а заадно і патрэніравацца перад наступнай, ужо спартыўнай паездкай — брэветам на 200 кіламетраў. Стараўся здымаць паездку на відэа, таму думаю, нешта атрымаецца зманціраваць і выкласці на YouTube. [YouTube](https://www.youtube.com/@vandrovar) | [Telegram](https://t.me/vandrovarny) | [Strava](https://www.strava.com/athletes/vandrovar) | [Komoot](https://www.komoot.com/user/4110270402623)
**MY.GAMES прадае DonationAlerts і Boosty** MY.GAMES паведаміла аб продажы кампаніі CEBC і яе сервісаў DonationAlerts і Boosty. Яны ўвойдуць у склад групы кампаній, якая належыць заснавальніку Broadsmart Group — Паўлу Харанеку (Pavel Kharaneka). Паведамляецца, што гэта прадпрымальнік з Кіпра. Завяршыць куплю плануюць у трэцім квартале 2024 года, сума і ўмовы не раскрываюцца. Кампанія растлумачыла, што продаж гэтых актываў дазволіць ёй «цалкам засяродзіцца» на прыярытэтным бізнэсе — распрацоўцы і выданні гульняў.
**Галандскі ракурс (dutch angle)** — гэта здымак, у якім камера паварочваецца вакол восі аб'ектыва адносна гарызонту або вертыкальных ліній кадра. Асноўнае выкарыстанне галандскага ракурсу — выклікаць у гледача пачуццё трывогі або дэзарыентацыі. _til ← сёння я даведаўся_
**Stripe acquires Lemon Squeezy** І вось нешта не ведаю, радавацца ці не? Бо для індыхакераў з краін не першага свету гэта быў альтэрнатыўны варыянт прымаць грошы на сваіх сервісах, дзе не працуюць ані Stripe, ані PayPal. А такіх краін даволі шмат, нават без уліку асабліва таксічных. Да таго ж, Lemon Squeezy працуе ў фармаце merchant of record, што азначае, што яны бяруць на сябе ўсе задачы па апрацоўцы плацяжоў, падаткі, справаздачнасць і іншыя моманты з дакументамі. І для якога-небудзь мікра-SaaS праекта, які толькі-толькі пачынае свае першыя крокі, гэта выдатнае рашэнне. Цяпер жа невядома, ці будзе палітыка Stripe з іх частымі блакіроўкамі розных сервісаў пашырана і на кліентаў 🍋. Альтэрнатывы, вядома, ёсць, але LS былі аднымі з самых дэмакратычных да новых сервісаў і бадай самымі зручнымі адносна інтэграцый.
«Усё кампутарнае гніе хутчэй за бульбу.» Бадай цалкам з гэтым згодны. Як ні рабі надзейна, абнаўленні ўсяго навокал у выніку зламаюць самае надзейнае рашэнне, нават не спытаўшыся.
Давайце тут напішам вядомыя вам хуткагаворкі, каб трэніраваць дыкцыю. На рускай такіх вядома шмат, але ж беларуская мова адрозніваецца па маўленню.
Бясплатная сістэма GPS каштуе каля $2 млн у дзень 🤯
Мы ўсе настолькі звыкліся з тым, што існуе GPS ці яе аналагі, што ўспрымаем гэта як належнае — як электрычнасць ці той жа інтэрнэт. Хаця тэхналогія ўпершыню з'явілася не так і даўно.
Ваенная праграма пачалася ў 1973 годзе, а першы прататып спадарожніка быў запушчаны ў 1978-м. Але падтрымка сістэмы ў працоўным стане, кантроль і каліброўка спадарожнікаў патрабуе нямалых выдаткаў, якія ідуць з падаткаў амерыканскіх грамадзян.
Для працы сістэмы патрэбны мінімум 24 спадарожнікі, максімальна можа быць 32, але звычайна працуе 31. За ўвесь час пабудавана 83 штукі: 31 зараз працуе, 4 зламаныя ці ў рэзерве, 41 скончылі працу, 2 страчаны падчас запускаў і адзін прататып не быў запушчаны ўвогуле.
З ліпеня 2023 года 18 спадарожнікаў пачалі перадаваць сігнал L5, які дазваляе разлічваць звышдакладнае месцазнаходжанне да 30 сантыметраў. Да 2027 года плануецца такімі зрабіць усе 24 спадарожнікі.
Цікава, што спачатку дакладнасць для цывільных была абмежавана на адзнацы 100 метраў — дзякуючы сістэме Selective Availability, якая спецыяльна пагаршала якасць сігналу. Абмежаванне было знята пасля катастрофы самалёта кампаніі Korean Air, які адхіліўся ад курса і быў збіты над тэрыторыяй Расіі (загінулі ўсе 269 пасажыраў).
Відаць, прыбыткі ад падаткаў, якія генерыруюць кампаніі, што карыстаюцца GPS, перавышаюць выдаткі на абслугоўванне сістэмы, таму яна і застаецца бясплатнай для спажыўцоў.
І яшчэ адзін цікавы момант: сістэма працуе ў адным напрамку — дасылае сігнал на прылады, але не мае адваротнага канала, каб ідэнтыфікаваць спажыўцоў і спагнаць з іх грошы за выкарыстанне 😁
Разбіралі баг з недахопам грошай на балансе аднаго з карыстальнікаў. Каб упэўніцца, што ўсё добра ў іншых, давялося шукаць нетрывіяльны спосаб праверыць астатнія рахункі.
**Архітэктура:** у карыстальніка ёсць рахункі ў розных валютах і асобна ёсць спіс транзакцый па кожным з рахункаў. Транзакцыі зроблены метадам падвойнага бухгалтарскага запісу, таму кожны рахунак мае ўваходныя і выходныя транзакцыі. Кожная транзакцыя захоўвае так сама і значэнне канчатковага балансу на той момант, калі яна была створана.
**Запыт 1** правярае, што баланс на рахунку адпавядае суме ўсіх транзакцый па гэтым рахунку, і выводзіць тыя рахункі, дзе ёсць разыходжанні. Калі нічога не вярнуў — значыць усё добра.
**Запыт 2** разлічвае нарастаючы вынік для кожнай транзакцыі ў межах аднаго рахунка і параўноўвае з фактычным значэннем балансу, якое захавана ў транзакцыі. Гэта дазваляе знайсці канкрэтную транзакцыю, пасля якой паўстала разыходжанне.
Такі падыход дапамагае хутка лакалізаваць праблему ў дадзеных, не перабіраючы транзакцыі рукамі.
Як атрымаць назвы і спасылкі на ўсе відэа пэўнага аўтара з YouTube? Рубрыка #til.
Не ведаю, навошта вам гэта можа спатрэбіцца, але калі ж цікава — вось інструкцыя па кроках.
**Крок 1.** Адчыніце старонку аўтара з відэа на YouTube.
**Крок 2.** Запусціце наступны код у кансолі браўзера, каб аўтаматычна пракруціць старонку ў самы ніз. Іх можа быць шмат, таму давядзецца пачакаць (можна і рукамі, калі не лянота 🤓).
**Крок 3.** Калі старонка прагартана да канца, спыніце таймер і пачысціце вывад кансолі.
Каб адчыніць кансоль у Google Chrome: правай кнопкай мышы → **Inspect** → перайсці да ўкладкі **Console**.
**Крок 4.** Уводзім сам запыт:
```js const links = document.querySelectorAll('a#video-title-link'); links.forEach((a) => console.log(a.title + '\t' + a.href)); ```
Спачатку шукаем на старонцы ўсе спасылкі — html-элементы `a`. А потым праходзім па іх і адбіраем толькі тыя, што маюць ідэнтыфікатар `video-title-link`.
**Крок 5.** Капіруем усё, что вывела кансоль, і пераносім у тэкставы рэдактар ці Excel для наступнай апрацоўкі.
Калі справіліся — вы малайчына і нават сапраўдны праграміст! 🎉
**Айцікаст — падкаст пра тэхналогіі па-беларуску 🎙** Цікава, што цяперашні праект «Тэхнабеларус», дзе я намагаюся распавядаць пра тэхналогіі па-беларуску ў розных фарматах, калісці быў ідэяй менавіта падкасту. Можна сказаць, вяртаемся да каранёў! У падкасце я буду распавядаць пра гісторыю стварэння галіны інфармацыйных тэхналогій, пра прафесіі, пра мовы праграмавання, пра асноўныя паняцці, якімі карыстаюцца праграмісты штодзень, а яшчэ пра прадукцыйнасць, цікавыя і зручныя інструменты, і часам агляды важных навін. Падкаст ужо апублікаваны і даступны на многіх вядомых пляцоўках: [Podcasters for Spotify](https://podcasters.spotify.com/pod/show/ikbytech) | [Mave](https://ikbytech.mave.digital/)
У Казахстане сёння цікава. Дзень будзе доўжыцца 25 гадзін, бо ўся краіна пераходзіць на іншую часавую зону.
Я хоць і рэкамендую выкарыстанне генератараў сайтаў і ўмоўна бясплатных файлавых хостынгаў, але нават з імі могуць здарацца непрыемнасці. Такая непрыемнасць нядаўна адбылася з адным з карыстальнікаў Netlify, якому выставілі ў разлік **$100 000** (сто тысяч) за выкарыстанне рэсурсаў сервіса звыш нормы. Сайт 4 гады як быў размешчаны на хостынгу і па словах уладальніка меў добра калі 200 наведвальнікаў на дзень. Хутчэй за ўсё сайт быў атакаваны метадам DDoS, што і вызвала вялікія выдаткі на абслугоўванне. Уладальнік звярнуўся ў падтрымку і там яму адказалі, што звычайна за такія выпадкі, калі была атака, яны бяруць 20% ад агульнай сумы выдаткаў (то бок 20 тысяч!), але з-за таго, што сума і так надта вялікая, яны прапанавалі яму варыянт — 5%, то бок заплаціць усяго 5 тысяч. 🤡 Тэма актыўна пачала абмяркоўвацца на Reddit і HackerNews і для ўладальніка сайта завяршылася даволі паспяхова. У адну з галін абмеркавання прыйшоў дырэктар Netlify і сказаў, што па іх абноўленых правілах сістэма не будзе выключаць сайты, якія былі атакаваны зламыснікамі, але яны будуць дараваць выдаткі, якія яны панеслі. Добра, што вынік станоўчы, але не вядома, як бы завяршылася б гэтая гісторыя, калі б не шырокі розгалас. Таму нягледзячы на тое, што сервіс усё яшчэ выдатны і зручны, патрэбна з засцярогай падыходзіць да выкарыстання любых сервісаў.
Магу з дакладнасцю ў 99 адсоткаў заявіць, што ў праграмістаў ёсць чуйка, ці хутчэй нават прафесійная дэфармацыя. Гучыць прыблізна так: «Калі на пытанне не адказваць гадзіну, ёсць верагоднасць, што праблему вырашаць без мяне».
Мінусы быцця інжынерам: у гадзіну ночы табе можа прыйсці ідэя, а чаму б не збіраць паказальнікі лічыльнікаў вады аўтаматычна — і цябе адпускае толькі ў 3 гадзіны на кошыку магазіна з камерамі для Arduino.
Open Source — гэта толькі 10% кода, а ўсё астатняе — узаемаадносіны паміж людзьмі.
Нататка
Некалькі даволі старых фота ў дадатак да допісу пра веламатарства. Архіў з першых брэветаў і вела-прыгодаў.
Я не надта вялікі спецыяліст па вышэйшай матэматыцы — ва ўніверсітэце было лянота ёй займацца і прагульваў пары — але ж гэтая навука ўсё роўна мяне захапляе сваёй містычнасцю.
І вось гэтым разам натрапіў на лік 6174, які акрамя як містыкай не назавеш.
Лік 6174 — натуральны лік, на першы погляд нічым не адметны, пакуль не пачаць яго вывучаць. Вядомы пад назвай **пастаяннай Капрэкара**, па імені вынаходцы — індыйскага матэматыка.
Вазьміце любы чатырохзначны лік, дзе выкарыстоўваецца як мінімум дзве розныя лічбы (пачатковыя нулі дазваляюцца). Расстаўце лічбы ў парадку змяншэння, а потым у парадку ўзрастання, каб атрымаць два чатырохзначныя лікі. Адніміце меншы ад большага. Паўтарайце.
У выніку вы заўсёды дойдзеце да ліку 6174 не болей чым за 7 паўтораў.
Напрыклад, для 1410 (год Грунвальдскай бітвы):
``` 4110 − 0114 = 3996 9963 − 3699 = 6264 6642 − 2466 = 4176 7641 − 1467 = 6174 7641 − 1467 = 6174 ← і так далей ```
Для трохзначных лікаў аналаг пастаяннай Капрэкара — лік 495. Для любога трохзначнага ліку без паўтораў лічбаў патрабуецца не болей шасці ітэрацый.
Для двух-, пяці- і сямізначных лікаў нерухомых кропак пераўтварэння Капрэкара не існуе.
Bloomberg апублікавалі інтэрв'ю, дзе гаворыцца, што iOS 18 стане самым вялікім абнаўленнем аперацыйнай сістэмы за ўсю гісторыю Apple. Людзі пішуць: «Вы такога ніколі раней не бачылі! Ні што іншае, як рэвалюцыя! Вы зможаце змяніць колер праграмы Clock!»
Правалам апошняга тыдня лічу баг з валідацыяй, які мы выпадкова знайшлі ў пятніцу, праглядаючы дзіўныя паведамленні пра памылкі ў логах. Мы зрабілі праверку: калі палі ў форме запоўнены — кнопку формы фарбуем у яркі колер, інакш яна ў стане «не нажымаецца». Але праверку ў саму функцыю дадаць **забылі**, і яе такі можна нажаць, аказваецца! Візуальна ўсё працуе, а па факце — не. 😅
Многія рэчы ў мовах праграмавання з'явіліся з нагоды зручнасці напісання праграм. Але ж куды важней мець магчымасць чытаць і хутка разумець напісанае — і сінтаксічны цукар хутчэй перашкаджае, чым дапамагае.
«Напісанне праграм без тыпаў дазваляе рухацца на поўнай хуткасці. На поўнай хуткасці да абрыву.»
Няма нататак, якія адпавядаюць абраным фільтрам.